पुण्यातील उंड्री आणि महम्मदवाडी परिसरातील नागरिक सध्या भीषण वाहतूक कोंडीमुळे त्रस्त झाले आहेत.
या भागात अनेक नामांकित शाळा, मोठ्या हाउसिंग सोसायट्या आणि निवासी प्रकल्प उभे राहिले आहेत. मात्र लोकसंख्या आणि वाहनांची संख्या झपाट्याने वाढत असताना रस्ते मात्र आजही तेच आहेत.
सकाळी शाळा सुरू होण्याच्या आणि दुपारी सुटण्याच्या वेळेत परिस्थिती अधिक गंभीर होते. शाळेच्या बस, पालकांची वाहने आणि कार्यालयाकडे जाणारी गर्दी यामुळे रस्त्यांवर लांबलचक वाहनांच्या रांगा लागतात.
स्थानिक नागरिकांनी अनेकदा प्रशासन आणि वाहतूक पोलिसांकडे तक्रारी केल्या आहेत. मात्र वाहतूक नियंत्रणासाठी पुरेसे पोलीस नसल्याने समस्या कायम असल्याचा आरोप नागरिक करत आहेत.
रस्त्यांचे रुंदीकरण, पर्यायी रस्ते आणि प्रभावी वाहतूक नियोजन ही काळाची गरज बनली आहे.
आता प्रशासन या प्रश्नावर ठोस उपाययोजना करणार का? याकडे उंड्री-महम्मदवाडीकरांचे लक्ष लागले आहे.
