बारामतीत दुहेरी हत्याकांड! घरात झोपलेल्या 2 महिलांची निर्घृण हत्या; आरोपी फरार

बारामती तालुक्यातील शेरेवाडी गावात दुहेरी हत्याकांडाने खळबळ उडाली आहे. घरात झोपलेल्या दोन महिलांची मध्यरात्री निर्घृण हत्या करण्यात आल्याची धक्कादायक घटना समोर आली आहे.
मृत महिलांची नावे कृष्णाबाई लडकत आणि इंदुमती लडकत अशी आहेत. दोन्ही महिला घरात झोपलेल्या असताना अज्ञात व्यक्तीने त्यांच्यावर धारदार शस्त्राने वार केल्याची प्राथमिक माहिती आहे. या घटनेत दोघींचा मृत्यू झाला.
घटनेची माहिती मिळताच बारामती पोलिसांनी घटनास्थळी धाव घेतली. घरातील परिस्थिती पाहून परिसरात भीतीचे वातावरण निर्माण झाले. पोलिसांनी दोन्ही मृतदेह ताब्यात घेऊन शवविच्छेदनासाठी रुग्णालयात पाठवले आहेत.
या दुहेरी हत्येमागचे नेमके कारण अद्याप स्पष्ट झालेले नाही. हत्येनंतर संशयित आरोपी फरार असल्याची माहिती असून, त्याचा शोध घेण्यासाठी पोलिसांकडून विविध दिशांनी तपास सुरू आहे.
उपलब्ध पुरावे, घटनास्थळाची पाहणी आणि स्थानिकांकडून मिळणाऱ्या माहितीनुसार पोलिस तपास करत आहेत. या घटनेमुळे शेरेवाडीसह संपूर्ण बारामती तालुक्यात खळबळ उडाली आहे.