अनाथ, गरजू विद्यार्थ्यांचे पालकत्व स्वीकारणाऱ्या ए. एल. नरसिंगराव यांना ‘लोककल्याण भूषण’ पुरस्कार! डॉ. सदानंद मोरे यांचे गौरवोद्गार; लोककल्याण प्रतिष्ठानचा २४ वा पुरस्कार सोहळा उत्साहात

तुकाई दर्शन : अनाथ आणि गरजू विद्यार्थ्यांचे पालकत्व स्वीकारून त्यांना संपूर्ण शैक्षणिक शुल्कमाफी देणे, तसेच आईची माया नसलेल्या विद्यार्थ्यांना निम्म्या शुल्कात शिक्षणाची संधी उपलब्ध करून देत त्यांच्या आयुष्यात आई-वडिलांची भूमिका निभावणारे ए. एल. नरसिंगराव यांचे कार्य प्रेरणादायी आहे. अशा व्यक्तींचा पुरस्कार देऊन गौरव केल्याने समाजातील इतरांनाही या सेवाकार्यातून प्रेरणा मिळते, असे प्रतिपादन संत साहित्याचे गाढे अभ्यासक डॉ. सदानंद मोरे यांनी केले.

लोककल्याण प्रतिष्ठानच्या वतीने आयोजित **२४ व्या ‘लोककल्याण भूषण-२०२६’ पुरस्कार सोहळ्यात** ते प्रमुख पाहुणे म्हणून बोलत होते. यावेळी शैक्षणिक क्षेत्रातील सामाजिक योगदानाबद्दल ए. एल. नरसिंगराव यांना लोककल्याण भूषण पुरस्काराने सन्मानित करण्यात आले.

पुरस्काराचे मानचिन्ह डॉ. सदानंद मोरे यांच्या हस्ते, तर मानपत्र लोककल्याण प्रतिष्ठानचे अध्यक्ष राजाभाऊ होले यांच्या हस्ते प्रदान करण्यात आले. यावेळी डॉ. सदानंद मोरे यांनाही राजाभाऊ होले यांच्या हस्ते ‘लोककल्याण गौरव’ सन्मानचिन्ह देऊन गौरविण्यात आले.

शिक्षणसेवेतील योगदानाचा गौरव

कार्यक्रमात बोलताना प्रतिष्ठानचे अध्यक्ष राजाभाऊ होले म्हणाले, “केजी ते पीजीपर्यंत शिक्षण देण्याची जबाबदारी खरे तर सरकारची आहे. मात्र, नरसिंगराव यांच्यासारख्या व्यक्ती सर्वसामान्यांना माफक शुल्कात शिक्षण उपलब्ध करून देत ही जबाबदारी समाजाच्या सहभागातून पार पाडत आहेत. अशा सेवाभावी व्यक्तींच्या कार्याला समर्पित हा पुरस्कार आहे.”

पुरस्काराला उत्तर देताना ए. एल. नरसिंगराव म्हणाले, “मला मिळालेला हा पुरस्कार मी माझ्या शैक्षणिक कार्याचा गौरव समजतो आणि तो नम्रपणे स्वीकारतो.” यावेळी श्रीनाथ म्हस्कोबा साखर कारखान्याचे कार्याध्यक्ष विकास रासकर यांनीही मनोगत व्यक्त केले.

मान्यवरांची उपस्थिती; कार्यकर्त्यांचे योगदान

या सोहळ्याला प्राचार्य अवघडे सर, श्रीनाथ म्हस्कोबा साखर कारखान्याचे कार्याध्यक्ष विकास रासकर, लोककल्याण प्रतिष्ठानचे अध्यक्ष राजाभाऊ होले, कार्याध्यक्ष हरिश्चंद्र कुलकर्णी, उपाध्यक्ष दिलीप भामे, सचिव इंद्रपाल हत्तरसंग, कोषाध्यक्ष पांडुरंग शेंडे, नगरसेविका प्राची देशमुख, प्रजापिता ब्रह्मकुमारीच्या लता पाटील, लक्ष्मण निंभोरे आदी मान्यवर उपस्थित होते.

कार्यक्रमाचे प्रास्ताविक दिलीप भामे यांनी केले. सूत्रसंचालन वर्षा शेंडे यांनी केले, तर प्रा. एस. टी. पवार सर यांनी लोककल्याण भूषण पुरस्काराच्या मानपत्राचे वाचन केले. हरिश्चंद्र कुलकर्णी यांनी आभार मानले. कार्यक्रमाच्या यशस्वितेसाठी चंद्रकांत वाघमारे, सुभाष कदम, प्रविण होले आणि प्रतिष्ठानच्या कार्यकर्त्यांनी परिश्रम घेतले.

समाजातील गरजू विद्यार्थ्यांना शिक्षणाची संधी मिळावी आणि सेवाभावी व्यक्तींच्या कार्याचा आदर्श इतरांसमोर यावा, हा या पुरस्कार सोहळ्याचा महत्त्वपूर्ण संदेश ठरला.

*मायमराठी वृत्तपत्र प्रतिनिधी – गणेश भागीवंत*