जनसेवा सहकारी बँकेला ‘एक्सलन्स इन एनपीए मॅनेजमेंट’ पुरस्काराने सन्मानित
जनसेवा सहकारी बँकेला ‘एक्सलन्स इन एनपीए मॅनेजमेंट’ पुरस्काराने सन्मानित
दिनांक १९ नोव्हेंबर २०२६ रोजी
इंडियन को-ऑपरेटिव्ह समिट एक्सलन्स अवॉर्ड्स २०२६ अंतर्गत शहरी सहकारी बँकांच्या श्रेणीतील प्रतिष्ठित ‘एक्सलन्स इन एनपीए मॅनेजमेंट’ (Excellence in NPA Management) पुरस्काराने हडपसर, पुणे येथील जनसेवा सहकारी बँक लि. (Janaseva Sahakari Bank Ltd., Hadapsar, Pune) हिचा गौरव करण्यात आला आहे.
हा पुरस्कार रिझर्व्ह बँक ऑफ इंडियाचे (RBI) संचालक श्री. सतीश मराठे यांच्या हस्ते प्रदान करण्यात आला.
अकार्यक्षम मालमत्तेच्या (NPA) प्रभावी व्यवस्थापनात जनसेवा सहकारी बँकेने उल्लेखनीय नेतृत्व केले आहे. जाणूनबुजून कर्ज बुडवणाऱ्यांची (Wilful Defaulters) ओळख व घोषणा करण्याबाबतच्या रिझर्व्ह बँकेच्या चौकटीची प्रभावी अंमलबजावणी बँकेने यशस्वीरीत्या पूर्ण केली असून, सहकारी बँकिंग क्षेत्रात हा एक महत्त्वाचा टप्पा ठरला आहे. इतर शहरी सहकारी बँकांसाठीही बँकेची ही कार्यपद्धती मार्गदर्शक व संदर्भ ठरली आहे.
तांत्रिक निर्लेखन (technical write-offs) आणि कर्जवसुलीच्या सातत्यपूर्ण व कठोर प्रयत्नांमुळे कर्जदारांची जबाबदारी आणि कर्जशिस्त अधिक भक्कम झाली आहे. याचा थेट परिणाम म्हणून बँकेची ढोबळ एनपीए (Gross NPA) रक्कम एप्रिल २०२५ मधील ₹८२.८२ कोटीवरून मार्च २०२६ मध्ये ₹३८.६० कोटींपर्यंत कमी झाली आहे. तसेच, ढोबळ एनपीएची टक्केवारी (GNPA) एप्रिल २०२५ मधील ७.९१% वरून मार्च २०२६ मध्ये ३.३३% पर्यंत खाली आली असून, बँकेने मार्च २०२६ मध्ये निव्वळ एनपीए (Net NPA) ०.००% साध्य केला आहे.





