परशुराम आर्थिक विकास महामंडळाने ब्राह्मण समाजातील व अमृत महामंडळाच्या आर्थिकदृष्ट्या दुर्बल घटकांच्या विकासासाठी प्रयत्न करावे- उपसभापती डॉ. नीलम गोऱ्हे, राज्यातील ब्राह्मण समाजातील प्रलंबित समस्या व प्रश्नांबाबत आढावा घेतला आढावा
मुंबई, दि. २८ जानेवारी, २०२५ : शासनाने ब्राह्मण समाजातील आर्थिकदृष्ट्या दुर्बल घटकांच्या विकासासाठी ‘परशुराम आर्थिक विकास महामंडळ’ ची स्थापन केली आहे. या महामंडळाच्या माध्यमातून समाज विकासासाठी प्रयत्न करावेत , असे प्रतिपादन विधानपरिषदेच्या उप सभापती डॉ. नीलम गोऱ्हे यांनी केले.
विधानभवनात राज्यातील ब्राह्मण समाजातील प्रलंबित समस्या व प्रश्नाबाबत आढावा बैठक घेण्यात आली, त्यावेळी डॉ. गोऱ्हे बोलत होत्या. यावेळी बैठकीस परशुराम आर्थिक विकास महामंडळचे अध्यक्ष आशिष दामले, माधव भंडारी, वित्त विभागाचे अवर सचिव गजानन कातकाडे, उच्च व तंत्र शिक्षण विभागाचे सहसंचालक रुपेश राऊत, सामाजिक न्याय व विशेष सहाय्य विभागाचे उप सचिव वर्षा देशमुख, महाराष्ट्र संशोधन, उन्नती व प्रशिक्षण प्रबोधिनी (अमृत) च्या निबंधक डॉ. प्रिया देशपांडे, कौशल्य विकास विभागाचे अतिरिक्त मुख्य कार्यकारी अधिकारी अनिल सोनवणे, ब्राह्मण सभेचे पदाधिकारी उपस्थित होते.
उपसभापती डॉ. गोऱ्हे पुढे म्हणाल्या, ब्राम्हण समाज हा खुल्या प्रवर्गातील असल्याने जातीच्या निकषात बसत नाही. परंतु ब्राह्मण समाजातील काही परिवार आर्थिक उत्पनाच्या गटाच्या निकषात बसणारे आहे. त्यामुळे कमी उत्पन्न असणाऱ्या ब्राह्मण समाजाला शासकीय लाभ मिळवून देण्यासाठी प्रयत्न करावे. महाराष्ट्र संशोधन, उन्नती व प्रशिक्षण प्रबोधिनी (अमृत) व परशुराम आर्थिक विकास महामंडळाने ब्राह्मण समाजातील आर्थिक दृष्ट्या कमकुवत असलेल्या घटकाला लाभ मिळवून देण्यासाठी प्रयत्न करावे.
भविष्यात वेद पाठशाळांच्या सक्षमीकरणासाठी प्रयत्न करावे. तसेच संत विद्यापीठ व वैदिक पाठशाळा यांच्या एकत्रीकरणातून प्रमाणपत्र कोर्स सुरू करण्याबाबत उच्च व तंत्र शिक्षण विभागाने याबाबत अभ्यासपूर्ण अशी टिपणी सादर करावी, अशी सूचना डॉ. गोऱ्हे यांनी संबंधित अधिकाऱ्यांना केली.
उपसभापती डॉ.गोऱ्हे म्हणाल्या , मंदिराचे व्यवस्थापन सुलभ करण्यासाठी ब्राह्मण समाजाला कौशल्य विकास विभागामार्फत काही प्रशिक्षण वर्ग आयोजित करता येतील किंवा कसे याबाबत तांत्रिकबाबी तपासून नियोजन सादर करावे.
ब्राह्मण समाजातील आर्थिकदृष्ट्या दुर्बल घटकांना आर्थिक सहाय्य आणि विकासाच्या संधी उपलब्ध व्हाव्यात, या अपेक्षेने शासनाने परशुराम आर्थिक विकास महामंडळ’ ची स्थापना केली आहे, त्यामुळे ब्राह्मण समाजाच्या अडीअडचणी सोडवण्यासाठी महामंडळाने गतीने काम करावे.
महाराष्ट्र संशोधन, उन्नती व प्रशिक्षण प्रबोधिनी (अमृत) व परशुराम आर्थिक विकास महामंडळाने महिला लाभधारक वाढवण्यासाठी विशेष प्रयत्न करावे, असे डॉ. गोऱ्हे यांनी सांगून महाराष्ट्र संशोधन, उन्नती व प्रशिक्षण प्रबोधिनी (अमृत) महामंडळाचे कामकाजाबाबत समाधान व्यक्त केले.
