विवाह ठरलेल्या प्रियकरासोबत गेली; तरुणीचा अचानक मृत्यू!

बारामती शहरात विवाह ठरलेल्या प्रियकरासोबत बाहेर गेलेल्या एका तरुणीचा अचानक मृत्यू झाल्याने खळबळ उडाली आहे. या प्रकरणी अथर्व राजेंद्र मेहन, वय २७, याच्याविरोधात भारतीय न्याय संहितेच्या कलम 106(1) अंतर्गत गुन्हा दाखल करण्यात आला आहे.
मृत तरुणीने बी.एस्सी. अॅग्रीचे शिक्षण पूर्ण केले होते आणि ती MPSC परीक्षेची तयारी करत होती. अथर्वसोबत तिचे प्रेमसंबंध होते आणि दोन्ही कुटुंबांच्या संमतीने एप्रिल २०२६ मध्ये त्यांचा विवाह ठरला होता.
मात्र, घटनेच्या काही दिवस आधी तिच्या वागण्यात बदल झाल्याचे कुटुंबीयांचे म्हणणे आहे. तिच्या मैत्रिणीने अथर्व तिच्यावर शारीरिक संबंधांसाठी दबाव टाकत असून काही गोळ्या देत असल्याचे सांगितल्याचा दावा फिर्यादीत करण्यात आला आहे. या आरोपांची सत्यता अद्याप तपासाधीन आहे.
६ ऑगस्ट रोजी अथर्व तरुणीला प्रवेशाच्या कामासाठी बाहेर घेऊन गेला. त्यानंतर तिला चक्कर आल्याचे कुटुंबीयांना सांगण्यात आले. विविध रुग्णालयांत उपचारासाठी नेल्यानंतर सिल्वर जुबली हॉस्पिटलमध्ये डॉक्टरांनी तिला मृत घोषित केले.
तरुणीच्या आईने मृत्यूबाबत संशय व्यक्त केल्यानंतर पोलिसांनी गुन्हा दाखल केला आहे. तरुणीचा मृत्यू नेमका कशामुळे झाला, तिला कोणती औषधे देण्यात आली होती का आणि त्या दिवशी नेमके काय घडले, याचा तपास वैद्यकीय अहवाल आणि इतर पुराव्यांच्या आधारे सुरू आहे