रात्रीच्या बसमध्ये कंडक्टरचा गैरप्रकार?
नागपुरात रात्रीच्या बसप्रवासा दरम्यान एका महिलेसोबत गैरवर्तन केल्याचा धक्कादायक प्रकार समोर आला आहे. एकटी प्रवास करत असलेल्या महिलेच्या असहाय्यतेचा फायदा घेत खासगी बसच्या कंडक्टरने तिच्या छातीला अयोग्य स्पर्श केल्याचा आणि तिचे दोन्ही पाय पकडण्याचा प्रयत्न केल्याचा आरोप आहे.
मिळालेल्या माहितीनुसार, ७ सप्टेंबरच्या रात्री महिला नागपूरहून बिंधिया येथे जाण्यासाठी खासगी बसने प्रवास करत होती. बस एमपी बस स्टँड परिसरात असताना ही घटना घडल्याचे तक्रारीत नमूद करण्यात आले आहे.
महिलेच्या तक्रारीनंतर सीताबर्डी पोलिसांनी लैंगिक छळ आणि गैरवर्तनाच्या आरोपांप्रकरणी गुन्हा दाखल करून तपास सुरू केला आहे.
गुन्हा दाखल होईपर्यंत कथित आरोपी कंडक्टरची ओळख पटलेली नव्हती. ट्रॅव्हल्स ऑपरेटरकडून माहिती घेऊन आणि इतर पुराव्यांच्या आधारे आरोपीची ओळख पटवण्याचे काम पोलिसांकडून सुरू असल्याचे सांगण्यात आले आहे.
