पुणे: (रोखठोक महाराष्ट्र ऑनलाईन)
इर्टिका आणि ट्रकमध्ये धडक होऊन पुण्यातील लोणीकाळभोर जवळ भीषण अपघात झाला. यात 9 महाविद्यालयीन तरुणांचा जागीच मृत्यू झाल्याची धक्कादायक घटना घडली. हे तरुण रायगड पाहण्यासाठी गेले होते. दरम्यान रात्री 1 वाजण्याच्या सुमारास कारवरील नियंत्रण सुटल्याने हा अपघात घडला. लहानपणापासून एकत्र असलेल्या मित्रांनी मृत्यूला पण एकत्र कवटाळले, यवत व परिसरात हळहळ व्यक्त केली जात आहे.
लोणीकाळभोर जवळील कदम वाकवस्ती येथे पुणे-सोलापूर महामार्गावर हा अपघात घडला. कदम वाकवस्ती (ता. हवेली) येथील ग्रामपंचायत कार्यालयासमोर इर्टिका कार आणि ट्रक यांची समोरासमोर धडक झाली. ही धडक इतकी मोठी होती की कारमध्ये प्रवास करणाऱ्या 9 महाविद्यालयीन तरुणांचा जागीच मृत्यू झाला.
इर्टिका कारच्या चालकाचे गाडीवरील नियंत्रण सुटल्याने गाडी डिव्हायडर ओलांडून विरुद्ध दिशेने येणाऱ्या ट्रकला धडकली. मृतांमधील सर्वजण यवत (ता. दौंड) परिसरातील आहेत. हा अपघात रात्री 1 वाजेच्या सुमारास झाला. सर्व महाविद्यालयीन विद्यार्थी रायगडला फिरायला गेले होते. अक्षय भारत वाईकर, विशाल सुभाष यादव, निखिल चंद्रकांत वाबळे, सोनू ऊर्फ नूर महमद अब्बास दाया, परवेज आशपाक अत्तार, शुभम रामदास भिसे, अक्षय चंद्रकांत घिगे, दत्ता गणेश यादव आणि जुबेर अजिज अशी मृतांची नावे आहेत. लोणी काळभोर पोलीस अपघाताचा अधिक तपास करत आहेत
