लोकसभा निवडणुकीत “राष्ट्रवादीच्या घड्याळाच्या मनसेचे इंजिन” “छुपी आघाडी भाजपची राज्यातील गणिते बिघडविणार”

मुंबई : (रोखठोक महाराष्ट्र ऑनलाईन न्युज)
मनसे आग्रही असलेल्या ईशान्य मुंबई आणि कल्याण मतदार संघात राष्ट्रवादीने त्यांचे उमेदवार उभे केले आहेत. यामुळे आगामी लोकसभा निवडणूकीमध्ये राष्ट्रवादीसोबत मनसेचे इंजिन धावणार नसल्याचे चित्र स्पष्ट झाले. मात्र मनसे राष्ट्रवादीला पाठींबा देणार असून पंतप्रधान नरेंद्र मोदींविरोधात प्रचार करण्याची दाट शक्यता आहे. मनसेचा पुढील आठवड्यात १९ मार्चला मेळावा होणार आहे. यावेळी राज ठाकरे निवडणूकीचा रंग उधळणार असून त्यांच्या निवडणूकीची भूमिका जाहिर करणार असल्याची माहिती हाती आली आहे.

लोकसभा निवडणूकीच्या दृष्टीने आघाडी, युतीचे गणित जमले असताना मनसे मात्र चुप्पी साधून आहे. राज यांनी राष्ट्रवादीचे अध्यक्ष शरद पवार यांची घेतलेली भेट, राज यांना सोबत घेण्याबाबत राष्ट्रवादीचे नेते अजित पवारांनी केलेले सकारात्मक वक्तव्य, यामुळे मनसे राष्ट्रवादीसोबत जाणार का? अशा चर्चा रंगल्या होत्या. मात्र राष्ट्रवादीने मनसेचा डोळा असणारया ईशान्य मुंबईत संजय दिना पाटील तर कल्याणमध्येब बाबाजी पाटील यांना उमेदवारी जाहिर केली. यामुळे मनसेसाठी आघाडीचे दरवाजे बंद झाल्याचे स्पष्ट संकेत मिळाले.

मात्र ही ‘राज’कीय स्ट्रॅटेजी काही वेगळेच वळण घेणार आहे. मनसेच्या १३व्या वर्धापनदिनाला राज यांनी केलेल्या भाषणात मोदी, अमित शहा आणि भाजपला टार्गेट केले होते. मोदींचा उदो उदो करणारे भक्त ‘लावारीस’ असल्याची टीकाही केली होती. राज यांची भाजप विरोधी तोफ आता राष्ट्रवादीच्या मंचावरून धडाडण्याची शक्यता आहे.