पुणे ः प्रतिनिधी
राजकारणापेक्षा आज समाजातील प्रत्येक नागरिकाला आरोग्य सुविधा मिळावा, यासाठी प्रयत्न सुरू आहे. मात्र, केंद्र सरकारकडून राज्याला सापत्नक वागणूक दिली जात आहे. त्यातून मार्ग काढत राज्य सरकार जास्तीत जास्त चांगली आरोग्य सेवा देण्यासाठी प्रयत्नशील आहे, ही बाब निश्चितच कौतुकास्पद आहे. हडपसरमधील ग्लायडिंग सेंटरमध्ये जम्बो कोविड सेंटर सुरू करण्यासाठी प्रयत्न सुरू असून, लवकरच त्याला यश येईल, असे शिरुर लोकसभा मतदारसंघाचे खासदार डॉ. अमोल कोल्हे यांनी सांगितले.
व्हीजन हडपसरच्या माध्यमातून सामाजिक बांधिलकी जपत जनजागृती केली जात आहे. तसेच, समाजोपयोगी उपक्रम घेतले जातात. आजच्या (रविवार, दि. 18 एप्रिल) ऑनलाईन वेबिनार मध्ये शिरुर लोकसभा मतदारसंघाचे खासदार डॉ. अमोल कोल्हे यांचा सहभाग लाभला. त्यांनी मोलाचे मार्गदर्शन करून व्हीजन हडपसरसारखे उपक्रम इतरही ठिकाणी राबवून ऑनलाइन पद्धतीने सामाजिक समस्यांबरोबर वैचारिक देवाणघेवाण झाली पाहिजे, असे त्यांनी स्पष्ट केले.
खासदार डॉ. कोल्हे म्हणाले की, ऑक्सिजनचा पुरवठा वाढविण्यासाठी आमचा प्रयत्न असून, कंपन्यांच्या संपर्कातून आहेत. मात्र, काही अडचणी येत आहेत. मागिल वर्षीपेक्षा यावर्षी कोरोनाने उग्र रूप धारण केले आहे. त्यामुळे रेमडिसिव्हर इंजेक्शन, ऑक्सिजन, बेड, व्हेंटिलेटर बेड मिळत नाहीत. वैद्यकीय क्षेत्रासह त्यांना पूरक अधिकारी-कर्मचारी वर्ग 24 बाय 7 कार्यरत आहे. प्रत्येकाने सरकारला सहकार्य करण्याची गरज आहे, असे त्यांनी सांगितले.
हडपसर परिसरात कोरोनाचा ज्वर वाढत आहे. त्यामुळे प्रशासकीय यंत्रणेस मदत करण्यासाठी व्हिजन हडपसरच्या माध्यमातून ऑनलाईन झूम मीटिंग घेण्यात आली.
या मिटिंगमध्ये शिरूर लोकसभा मतदारसंघाचे खासदार डॉ. अमोल कोल्हे, आमदार चेतन तुपे, माजी महापौर वैशाली बनकर, माजी उपमहापौर निलेश मगर, व्हिजन हडपसरचे सदस्य सहभागी झाले होते.
दरम्यान, आमदार चेतन तुपे यांनी म्हणाले की, हडपसर परिसरात कोव्हीड हॉस्पिटलची संख्या वाढविली आहे, स्टाफ पुरेसा उपलब्ध नाही, आम्ही काही व्हेंटिलेटर उपलब्ध करून दिले आहेत, हॉस्पिटल बेडची संख्या लपवत आहेत, जम्बो कोव्हीड सेंटरसाठी जादा निधींची गरज आहे, उद्योजकांशी बोलून याबाबत कार्यवाही केली जाईल. महापालिका आयुक्त व जिल्हाधिकाऱ्यांच्या सतत संपर्कात असून हडपसर मतदारसंघात राजकीय मतभेद बाजूला ठेवुन कोरोना प्रसार रोखण्यासाठी आम्ही प्रयत्न करत आहोत.
पल्लवी सुरसे म्हणाल्या की, पुणे महानगरपालिकेच्या गोंधळेनगर येथील कै. रामचंद्र बनकर शाळेतील कोविड टेस्ट सेंटरमध्ये पिण्याचे पाणी नाही, महिलांसाठी टॉयलेटची सुविधा नाही, अशा अनेक समस्यांचा पाढा वाचला. पालिका प्रशासनाने कोविड चाचणी सेंटरची संख्या वाढवून नागरिकांची गैरसोय दूर करावी. कोविड तपासणी केल्यानंतर रिपोर्ट तातडीने देण्याची व्यवस्था करावी, अशी मागणी केली.
दीपक गायकवाड म्हणाले – कोव्हीड 19 पॉझिटिव्ह, विलीगिकरणमधील व्यक्ती सोसायटी व परिसरात फिरत असल्याने कोरोनाबाधितांची संख्या वाढत आहे. प्रशासनाने त्यावर कठोर उपाययोजना करण्याची गरज आहे.
दीपक कुदळे म्हणाले कोरोनाचा ज्वर वाढत असल्याने हडपसरमधील रुग्णालयातील ऑक्सिजन, व्हेंटिलेटर बेड कमी पडत आहेत. त्यामुळे शासनाने हडपसर ग्लायडिंग सेंटरमध्ये जम्बो कोविड सेंटर उभारून नागरिकांची गैरसोय दूर करण्याची गरज आहे. त्यासाठी खासदार, आमदार, नगरसेवकांनी एक पाऊल पुढे टाकण्याची आवश्यकता आहे.
सीताराम शरणागत बोलताना म्हणाले, जागतिक आरोग्य संघटनेच्या नियमानुसार पालिका प्रशासनाने सुविधा पुरवाव्यात, स्वच्छतेबाबत नियोजन व्हावे, लोकप्रतिनिधी व अधिकाऱ्यांना सहकार्य करण्यास व्हिजन हडपसर पुढाकार घेईल.
हरीश टेमगिरे आपल्या मनोगत मध्ये म्हणाले, कोरोनाबाधितांची संख्या वाढत असल्याने हडपसर परिसरात लसीकरण केंद्र वाढण्याची आवश्यकता आहे. त्यासाठी लोकप्रतिनिधी निवडणुकावेळी तत्परता दाखवतात, तशीच तत्परता येथे दाखविली पाहिजे. रेमडिसिव्हर इंजेक्शजन पुरवठा विस्कळीत झाला आहे, याबाबत पालिका अधिकारी व जिल्हाधिकारी यांना सूचना दिल्याच पाहिजेत.
तुषार पायगुडे – उपमुख्यमंत्री अजित पवार यांनी आमदारांना मतदारसंघात एक कोटी कोविड उपाययोजनासाठी आदेश दिले आहेत, हडपसरच्या आमदारांनी त्याची तातडीने अंमलबजावणी करून नागरिकांना आरोग्य सुविधा उपलब्ध करून दिली पाहिजे. कोरोनाबाधितांना उपचार मिळत नसल्याने त्यांची तडफड होताना पाहवत नाही, असे त्यांनी स्पष्ट केले.
अनिल मोरे – हडपसर मध्ये जम्बो कोव्हीड सेंटर उभारण्यासाठी निधीची कमतरता असल्याने दोन औद्योगिक वसाहत, दोन टाऊनशीप, सिरम कंपनी यांचा सीएसआर फंडाबाबत मागणी करावी, खासगी हॉस्पिटलमध्ये बिलांबाबत अनेक तक्रारी असून, पालिकेने लक्ष घातले पाहिजे.
माजी महापौर वैशाली बनकर म्हणाल्या गोंधळेनगर येथील मनपाच्या बनकर शाळेत अनेक समस्या असून, नागरिकांना यातना सहन कराव्या लागत आहेत, पालिकेने सुविधा पुरविण्याबाबत आदेश द्यावेत.
माजी उपमहापौर निलेश मगर म्हणाले, रेमडिसिव्हर इंजेक्शन जबाबदारी असणारे पालिकेचे अधिकारी आयुक्तांची परवानगी मागतात हे योग्य नाही. याबाबत खासदार आमदारांनी लक्ष घालावे.
डॉ.शंतनू जगडाळे यांनी हडपसर मधील बेडबाबत सविस्तर माहिती दिली. प्रशांत सुरसे, रोहिदास राऊत, राजेश अडसूळ यांनी काही सूचना केल्या.
ऑनलाइन बैठकीचे संचालन अनिल मोरे यांनी केले होते. प्रास्ताविक सीताराम शरणागत यांनी केले. रोहिणी भोसले यांनी आभार मानले.
